АНКЕТАНИ ТЎЛДИРИШ ҚОИДАЛАРИ

Истиқболли бошқарув кадрларини танлаб олиш бўйича “Тараққиёт” республика танловида иштирок этиш учун мазкур веб-порталда таянч олий маълумотга ва тегишли соҳада раҳбарлик лавозимида камида уч йил иш тажрибасига эга, 30 ёшдан 45 ёшгача бўлган (45 ёш ҳам қўшилган ҳолда)Ўзбекистон Республикаси фуқаролари рўйхатдан ўтишлари мумкин.

Веб-порталда рўйхатдан ўтиш учун аввал мобил телефон рақами ёрдамида ёки Идентификациялашнинг ягона тизими ID.GOV.UZ орқали рўйхатдан ўтиш зарур.

Иштирокчи талабгор веб-порталда рўйхатдан ўтиб, Ўзбекистон Республикаси Президентининг 2018 йил 30 майдаги ПҚ-3755-сонли Қарори билан тасдиқланган “Истиқболли бошқарув кадрларини танлаб олиш бўйича «Тараққиёт» республика танловини ташкил этиш ва ўтказиш тартиби тўғрисидаги низом”да қайд этилган қоидалар билан танишгани ва уларни қабул қилишини тасдиқлаган бўлади.

Танлов иштирокчисининг анкетаси уч бўлимдан иборат.

А бўлимида Идентификациялашнинг ягона тизими ID.GOV.UZ орқали рўйхатдан ўтгандан кейин барча паспорт маълумотлари акс этади. Агар талабгор мобил телефон рақами ёрдамида рўйхатдан ўтмоқчи бўлса, рақамни киритгандан кейин телефонига келган кодни бўш дарчага киритади. Сўнг АВТОРИЗАЦИЯ ойнаси пайдо бўлади, унга паспорт серия ва рақами, ҳамда ShR ни киритиш лозим. Намоён бўлган дарчада ShR батафсил кўрсатиб берилган.
Агар паспортнинг бирор-бир маълумотлари дарчаларда акс этмаса, уларни қўлда киритиш лозим.

А БЎЛИМИДА КИРИТИЛИШИ МАЖБУРИЙ БЎЛГАН МАЪЛУМОТЛАР:
 

1. Номинация – Танлов иштирокчиси анкетани қайси номинация бўйича топширишни ўзи  танлайди. Анкеталар кўриб чиқилиш жараёнида ишчи гуруҳ иштирокчига анкетада келтирилган иш тажрибасига қараб, номинацияни ўзгартиришни тавсия этиш ҳуқуқига эга. 

Танловнинг ҳар бир иштирокчиси фақат бир марта ва “Истиқболли бошқарув кадрларини танлаб олиш бўйича «Тараққиёт» республика танловини ташкил этиш ва ўтказиш тартиби тўғрисидаги низом”да кўрсатилган битта номинация бўйича рўйхатдан ўтиши мумкин.

2. Оилавий ҳолати – кераклисини танланг ва белгиланг 
3. Яшаш жойи– жорий яшаш вилоятини танлаш лозим, шундан кейингина қуйида жойлашган дарчага ўтилади ва унда вилоят туманлари акс этади – керакли туман танлаб олинади. Сўнг мустақил равишда кўча (даҳа ва ҳ.), уй (хонадон) рақами киритилади.
4. Телефон дарчасида  сиз ID.GOV.UZда рўйхатдан ўтганингизда кўрсатган рақам акс этади. Зарурат туғилганда уни ўзгартириш мумкин.
5. E-mail дарчасида сиз ID.GOV.UZ да рўйхатдан ўтганда кўрсатган почта манзили акс этади. Зарурат туғилганда уни ўзгартириш мумкин.
6. Мобил телефон рақами ёрдамида рўйхатдан ўтган ҳолатда прописка манзили ва e-mail қўлда киритилади.

Б БЎЛИМИДА ТЎЛДИРИЛИШИ ЛОЗИМ БЎЛГАН ДАРЧАЛАР:
 

1. Олий маълумот даражаси – даража танланади (бакалавр, магистр, ординатура, даражаси кўрсатилмаган ҳолда олий таълим тўғрисида диплом олинган бўлса, Даражасиз сатри танланади).
2. Мутахассислиги – олий таълим даражаси танланганидан кейин Мутахассислик дарчасида тегишли мутахассислик танланади. Мутахассислигингиз рўйхатда бўлмаса, бошқа мутахассислик дарчасига ўтилади ва мутахассислик қўлда киритилади.
3. Таълим муассасаси – таълим муассасалари рўйхатидан керакли ўқув муассасаси танланади. Таклиф этилаётган рўйхатда ўз ўқув муассасангизни топмасангиз, Бошқа ўқув муассасаси дарчасига ўтиб сиз тамомлаган ўқув муассасаси номини қўлда киритасиз.
4. Диплом – ушбу дарчада олий таълим тўғрисидаги ҳужжат нусхаси илова қилинади. Рухсат этилган файл типлари: pdf, doc, docx, jpeg, jpg, png, gif, jp2, pcx, максимал файл ҳажми 5МБ бўлиши зарур.
5. Илмий даража – мазкур дарчада уч вариантдан бири танланади: йўқ – илмий даража йўқ бўлганда, ф.н. – фан номзоди бўлсангиз, ф.д. – фан доктори.
6. Илмий унвон  – ушбу дарчада уч вариантдан бири танланади: йўқ, доцент  ёки  профессор.

МАЖБУРИЙ ДАРЧАЛАРДАН ТАШҚАРИ Б БЎЛИМИДА ТАЛАБГОРНИНГ ХОҲИШИГА КЎРА ТЎЛДИРИЛАДИГАН ДАРЧАЛАР МАВЖУД:

Ҳарбий (махсус) унвон – мазкур дарчада тегишли унвон танланиши лозим;
Чет тилини билиши – ушбу дарчада битта чет тили танланади;
Билими даражаси– чет тилини билиш даражаси танланади;
Чет тилини билиши ҳақидаги Сертификат – чет тилини билиш даражаси тўғрисидаги сертификат мавжуд бўлса, ушбу ҳужжат нусхаси илова қилинади. Рухсат этилган файл типлари: pdf, doc, docx, jpeg, jpg, png, gif, jp2, pcx, максимал файл ҳажми 5МБ бўлиши зарур.
Талабгор бошқа чет тилини ҳам билса, Тил қўшиш тугмаси активлаштирилади ва тегишли дарчалар тўлдирилади.

В БЎЛИМИДА ТЎЛДИРИЛИШИ МАЖБУРИЙ БЎЛГАН ДАРЧАЛАР:
 

1. Тармоқ (соҳа) – мазкур дарчада талабгор ишлаётган тармоқ ёки соҳа танланади;
2. Кейинги дарчада фаолият соҳаси аниқлаштирилади, фаолият соҳаси ёки тармоғининг муайян қисми танлаб олинади;
3. Иш жойи – ушбу дарчада талабгор ишлаётган ташкилот ёки идоранинг номи танланади;
4. Бошқа иш жойи – иш жойингиз рўйхатда бўлмаса, бошқа иш жойи номини киритинг;
5. Лавозим – тегишли лавозим танланади, лавозим рўйхатда мавжуд бўлмаса, уни қўлда киритиш мумкин;
6. Меҳнат дафтарчаси – мазкур дарчада меҳнат дафтарчасининг нусхаси (барча саҳифалари) илова қилинади. Рухсат этилган файл типлари: pdf, doc, docx, jpeg, jpg, png, gif, jp2, pcx, максимал файл ҳажми 5 МБ бўлиши зарур;
7. Бошқарувдаги тажрибаси – талабгор бошқарувдаги тажрибасига оид маълумотни (йиллар сони) қўлда киритади.

Талабгорнинг хоҳишига кўра Давлат ва идоравий мукофотлар, фахрий унвонлар дарчаси тўлдирилади. Сичқончани бўш дарчага қаратиб, мукофотлар рўйхати очилади ва кераклиси танланади. Сўнг мукофот гувоҳномасининг нусхаси илова қилинади.

Аризачи бошқа Диплом, сертификат, фахрий ёрлиқларга эга бўлса, уларнинг ҳам нусхалари илова қилиниши мумкин.

Бир неча ҳужжатлар (дипломлар, сертификатлар) илова қилинаётганда барча файллар белгиланиши лозим, шундан кейингина Илова қилиш тугмаси босилади.
Барча дарчалар тўлдирилганидан сўнг Ариза бериш тугмаси босилади.

Танлов иштирокчилари анкетада ишончли ахборотни тегишли шаклга кўра кўрсатишлари шарт. Анкетага олдиндан ёлғон ахборотни киритиш иштирокчини танловдан чиқаришга асос бўла олади.