Жорий йилнинг 30 май куни “Истиқболли бошқарув кадрларини танлов асосида танлаб олишнинг замонавий тизимини яратиш чора-тадбирлари тўғрисида” ПҚ-3755-сонли Президент Қарори қабул қилинди. Ҳужжатда давлат ва хўжалик бошқаруви органлари, маҳаллий ижро этувчи ҳокимият органлари, бошқа давлат органлари ва ташкилотлари тизимида кадрларнинг касбий малакасини узлуксиз ошириб боришга кўмаклашиш кўзда тутилган. Мазкур Қарорга кўра Ўзбекистон Республикаси Президенти хузуридаги Давлат бошқаруви академияси, Инновацион ривожланиш вазирлиги, ва “Буюк келажак” халқаро нодавлат нотижорат ташкилотининг ҳар уч йилда истиқболли бошқарув кадрларини саралаш бўйича “Тараққиёт” республика танловини ўтказиш тўғрисидаги таклифи маъқулланди.
Танловда таянч олий маълумотга ва тегишли соҳада раҳбарлик лавозимида камида уч йиллик иш тажрибасига эга, 30 ёшдан 45 ёшгача бўлган (45 ёш ҳам қўшилган ҳолда) Ўзбекистон Республикаси фуқаролари иштирок этиши мумкин.
“Тараққиёт” республика танловида талабгорлар 16 та номинация бўйича ўз соҳасидан келиб чиқиб иштирок этишлари кўзда тутилган. Номинациялар билан танлов сайтида танишиш мумкин.
Давлат ташкилотларида меҳнат қилаётган иштирокчиларнинг танловда қатнашиш даврида эгаллаб турган лавозими ва ўртача ойлик иш ҳақи сақлаб қолинади.
Танлов ғолибларига энг кам иш ҳақининг 50 баробари миқдорида, финал босқичининг қолган иштирокчиларига эса энг кам иш ҳақининг
25 баробари миқдорида бир марталик пул мукофоти тўланади. Танлов финал босқичининг қолган иштирокчилари тегишли соҳанинг бошқарув кадрлари захирасига киритилади.
Танлов ғолиблари ривожланган хорижий мамлакатларнинг соҳага оид ташкилотларида танловнинг тегишли номинациялари бўйича стажировка ўташни ўз ичига оладиган «Бошқарув кадрларини тайёрлаш бўйича Президент дастури»га мувофиқ уч ойлик курсларда ўқийди ва уни ўтагандан сўнг тегишли йўналишлар бўйича давлат ташкилотларида раҳбарлик лавозимларига тайинланади.
Танловда иштирок этиш учун taraqqiyot-tanlov.uz интернет порталига кириб, рўйхатдан ўтиш зарур. Бунинг учун талабгор, албатта, ONE.ID.UZ порталидан рўйхатдан ўтган бўлиши шарт.
Танловда иштирок этиш учун талабгорлар 2018 йилнинг 1 октябридан 30 октябрига қадар онлайн рўйхатдан ўтиши мумкин. Батафсил маълумот taraqqiyot-tanlov.uz порталида жойлашган.
Мазкур порталдан рўйхатдан ўтгандан сўнг талабгор анкетаси тўлдирилади. Танлов иштирокчилари анкетада белгиланган шаклда ишончли маълумотларни кўрсатиши шарт, нотўғри маълумотни киритиш, ўз навбатида, иштирокчини танловдан четлатишга сабаб бўлиши мумкин.
Иштирокчиларнинг анкеталарини ўрганиш учун ишчи гуруҳ таркиби танлов комиссиялари томонидан шакллантирилади. Ишчи гуруҳлари сони ва уларнинг аъзолари таркиби ҳар бир номинацияга тақдим этилган аризалар сонига боғлиқ ҳолда шаклланади.
Танлов иштирокчилари ўзлари томонидан тақдим этилган анкета қайси номинацияга тегишли бўлишини мустақил равишда белгилайди. Анкета кўриб чиқилаётганда ишчи гуруҳ вакиллари анкетада иштирок этган шаxс кўрсатган соҳадаги иш тажрибасига қараб номзодга номинацияни ўзгартиришни тавсия этиш ҳуқуқига эга бўлади.
Танлов веб-порталида танловнинг кейинги босқичида иштирок этувчилар рўйхати, танлов ўтказилиш куни, жойи эълон қилиб борилади.
Веб-порталга келиб тушган анкеталар ўрганилади, талабгорлар ақлий салоҳият (IQ-тест), психологик барқарорлик, хорижий тилларни билиши, сиёсий-ҳуқуқий ва ижтимоий-иқтисодий соҳалардаги ислоҳотлардан хабардорлик даражаси бўйича онлайн тестдан ўтказилади.
CEFR (Common European Framework of Reference) бўйича В2, IELTS (International English Language Testing System) бўйича 5,5 балл ва TOEFL (Test of English as a Foreign Language) бўйича 72 баллдан кам бўлмаган хорижий тилни билиш даражаси расмий тасдиқланганлиги ҳақидаги амалдаги халқаро сертификатларга эга бўлган иштирокчилар xорижий тилларни билиш даражаси бўйича тестлардан озод қилинади. Ушбу иштирокчиларга танловда максимал балл берилади.
Ёзма синовлар ва стажировка босқичида онлайн тестлардан муваффақиятли ўтган талабгорларга ёзма таҳлилий материаллар (маъруза) тайёрлаш учун ҳар бир номинация бўйича муаммоли, амалиёт билан бевосита боғлиқ бўлган таҳлилий фикрлашни назарда тутувчи, ҳар бири 5 саволни қамраб олувчи тезислар берилади.
Талабгорлар томонидан тегишли номинациялар кесимида 5 саволни қамраб олган мавзу бўйича тайёрланган ёзма таҳлилий материаллар (маърузалар) натижасида иштирок этувчилардан 300 нафар талабгорлар танлаб олинади.
Талабгорларнинг гуруҳда ишлаш кўникмаси, профессионаллик даражаси ва бошқарув қобилиятини аниқлаш мақсадида улар тегишли давлат ҳокимияти ва бошқаруви органлари, маҳаллий ижро ҳокимияти органлари, давлат ташкилоти ва идораларига бир ойлик стажировка ўташ учун жўнатилади.
Бир ойлик стажировка ҳамда талабгорларнинг ташкилотчилик қобилияти ва бошқарувчилик салоҳиятини аниқлашга қаратилган ёзма тест синови натижаларига асосан танловнинг финал босқичига тавсия этилган
150 нафар талабгор аниқланади.
Гуруҳларда муаммоли вазиятларни (кейслар) ечиш ва суҳбат жараёни бўйича танловнинг финал босқичига тавсия этилган 150 нафар талабгорнинг рўйхати, синовлар ўтказиладиган сана, вақт, жой ва шартлари танлов веб-порталида эълон қилинади.
Гуруҳларда муаммоли вазиятларни (кейслар) ечиш жараёни ва талабгорларнинг ҳар бири билан шахсан ўтказиладиган суҳбат натижаларига кўра танловнинг 50 нафар ғолиби аниқланади.
Муаллиф : "Тараккиет стратегияси" маркази
1379 10.09.18
